Azerbaycan ulusal çalışqanı iran dustağında

فردین مرادپور آزربایجان میللی چالیشقانی زینداندا

چهارشنبه 21 اردیبهشت 1390 - May 11 2011

آزربایجان میللی چالیشقانی «فردین مرادپور» 26/03/1389 تاریخیندن بری تبریز مرکزی زیندانینین «11 تحت قرار» بندینده آلتی ایللیک حؤکمونو چکمک اوچون دوستاقدیر.فردین مرادپورون پرونده­سینه ضامین اولان وثیقه 04/02/1390 تاریخینده آزاد اولوندو. فردینین دوستاقلیغیندان 10 آیدان آرتیق زامان کئچسه­ ده ضامین وثیقه آزاد اولانمادیغی و پرونده­سینین ایجرای احکام شعبه­سینده ایجرایا قویولمادیغی اوچون دوستاق اولوندوغونون خبری مئدیا و سیته­لرده گئتمه­میشدی.

فردین مرادپور 1388-جی خوردادین بیری تبریز ائل­گؤلوسونده 85 خورداد حماسه­سی ایل­دؤنومو موناسیبتی ایله قورولان مراسیمده میللی شوعارلار سسلندیردییی اوچون، مأمورلارین الیندن قاچارکن گولـله­نیب، آغیر یارالانیب؛ سیپاهین خسته­خاناسینا مونتقیل اولونموشدور.

اورادا، آتاسی «حسن مرادپور»دا فردین­له بیرلیکده ایطیلاعات نیرولاری وریندن توتوقلانمیشدیر. همن گون، فردین­ین آتا ائوینی آختاریب، قارداشی­نین وساییللاری و بیلگی­سایارینی آپاریب و او گون ائل­گؤلوده شخصی پالتارلی مامورلار الی ایله توتولان و اللریندن قاچابیلن قارداشی مرتضی مرادپورو دا، 4 گون سونرا اؤیرنجی یاتاق ائویندن توتوقلامیشدیلار. اوغلونون باشینا نه گلدییینی گؤرمک اوچون خسته­خانادان آیریلمایان، عائیله­نین سون نفری آناسی معصومه امانی ایسه خوردادین 8-ده ایطیلاعات ایداره­سی وریندن توتوقلانیب، تبریز زیندانینا آپاریلمیشدیر. بئله­لیکله مرادپور عائیله­سینی عینی زاماندا توتوقلامیشدیلار.

فردین مرادپور 4 آیا یاخین دوستاقدان سونرا 50 میلیون تومن­لیک وثیقه قاراری ایله آزاد بوراخیلمیشدیر. فردین 1369 دوغوملو و توتوقللاندیغی ایل 19 یاشیندایدی.